Epistle to William Creech (Poem by Robert Burns)

Old Poem



Epistle to William Creech
By Robert Burns


Auld chukie Reekie’s [1] sair distrest,
Down droops her ance weel-burnisht crest,
Nae joy her bonnie buskit nest
                Can yield ava,
Her darling bird that she lo’es best,
                Willie’s awa!

O Willie was a witty wight,
And had o’ things an unco slight;
Auld Reekie ay he keepit tight,
                An’ trig an’ braw:
But now they’ll busk her like a fright,
                Willie’s awa!

The stiffest o’ them a’ he bow’d;
The bauldest o’ them a’ he cow’d;
They durst nae mair than he allow’d,
                That was a law;
We’ve lost a birkie weel worth gowd,
                Willie’s awa!

Now gawkies, tawpies, gowks, and fools,
Frae colleges and boarding-schools,
May sprout like simmer puddock stools
                In glen or shaw;
He wha could brush them down to mools,
                Willie’s awa!

The brethren o’ the Commerce-Chaumer [2]
May mourn their loss wi’ doofu’ clamour;
He was a dictionar and grammar
                Amang them a’;
I fear they’ll now mak mony a stammer,
                Willie’s awa!

Nae mair we see his levee door
Philosophers and poets pour, [3]
And toothy critics by the score
                In bloody raw!
The adjutant o’ a’ the core,
                Willie’s awa!

Now worthy Gregory’s Latin face,
Tytler’s and Greenfield’s modest grace;
Mackenzie, Stewart, sic a brace
                As Rome n’er saw;
They a’ maun meet some ither place,
                Willie’s awa!

Poor Burns—e’en Scotch drink canna quicken,
He cheeps like some bewilder’d chicken,
Scar’d frae its minnie and the cleckin
                By hoodie-craw;
Grief’s gien his heart an unco kickin’,
                Willie’s awa!

Now ev’ry sour-mou’d girnin’ blellum,
And Calvin’s fock are fit to fell him;
And self-conceited critic skellum
                His quill may draw;
He wha could brawlie ward their bellum,
                Willie’s awa!

Up wimpling stately Tweed I’ve sped,
And Eden scenes on crystal Jed,
And Ettrick banks now roaring red,
                While tempests blaw;
But every joy and pleasure’s fled,
                Willie’s awa!

May I be slander’s common speech;
A text for infamy to preach;
And lastly, streekit out to bleach
                In winter snaw;
When I forget thee! Willie Creech,
                Tho’ far awa!

May never wicked fortune touzle him!
May never wicked man bamboozle him!
Until a pow as auld’s Methusalem
                He canty claw!
Then to the blessed New Jerusalem,
                Fleet wing awa!


FOOTNOTES:

[1] Edinburgh.

[2] The Chamber of Commerce in Edinburgh, of which Creech was Secretary.

[3] Many literary gentlemen were accustomed to meet at Mr. Creech’s house at breakfast.

0 Response to "Epistle to William Creech (Poem by Robert Burns)"

Post a Comment